منو مثلي الثلج امنه ابجف الصيف
و كله ايدير باله اتلوحه لحروره
و منو مثلي اعله نيته شلون طير الهور
اجه بلهفه و حنين و ما حضه بهوره
و منو مثلي سكت شاف الزرع مبيوك
و دره البوكات كلهه بيت ناطوره
ولو روحي بنفسهه تريد كلشي ادكول
اعض شفتي و اكلهه الكاع محضوره
على بختج يروحي مالي حيل الروج
و شراعي تعب و الدفه مكسوره
و ولا ساحل بقه و ادري الصخر ميطوف
حتى اتعب و ادور صخره مشموره
و عتبنه اعله الصبر يا روحي مو عالعين
اذا ميصير سد الدمعه معذوره
