عصرت وكت

وصلتني الرسايل. ماتريدوني
ونه المعروف , لا تافه ولا دوني
رافع روسكم ..جنت.. ابحسن ملكاي
امعزب واطي لليجبل اعيوني
ومن ايصير موقف ما ادنك الراس
للميدان اطب .. وانتم تعرفوني
ما انتظر واحد يجي ايدك الباب
اخوتي وبالموازم عيب تنخوني
جنت اعذركم لوحدكم اتكعدون
تفزعون الغريب , وانه تنسوني
كره عدكم علية بلاسبب تحجون
واعذركم واكولون مايقصدوني
ما عدي ذنب ياعمي لا غلطان
واذا غلطان , وين الغلط دلوني
ذكروني اذا جدمي سهه وزليت
وما بيهه زعل لمن تذكروني
يعصرني الوكت , واحتاج للوكفات
لكن ما كلت , ها اخوتي اطوني
باب الغربه ادكه , مااشوف احراج
وما اطبكم واكولن عيب يطوني
ماجن من صلبك طالع اوفد ديس
رحمه الروح ابوكم خويه عوفوني
اخوت يوسف انتم ادري شتريدون
اروح اسرح اوياكم حاضر اخذوني
ومن نوصل هناك المرعه موش ابعيد
مثل يوسف اباقرب بير ذبوني
مثل يوسف بنص البير ذبوني
جليل الغريب