الشاعر عزيز السماوي
يامن يودي الجرح.. مشعل گصب ترحيب
إذكر زين..
النذل :خنجر نذل
والطْيِب :گمره إوطْيب
رف الحنين ابضلع مكسور
چفي حمامه إوتظل كل السنين إدور
إخذني أنتَ الفرح و لبيتك إتعنّيت
أچفوفي نار الرفض
ظلمه
إوإلك.. صلّيت
ردتك صهيل الياخذ إچفوفي اغاني إودم
ردتك بصرة السيّاب.. فهمني.. أريد افهم
مشاعل بالبيوت أتريد.. تتكلم
مهره إتهيم بچفوفي گمر يحلم
زلم بالجوع تتلثم
يطيح الخوف يتهدم
يتحرك الدم
ثوره إتوج ظلام الموت
گمريه..
إبنهار أظلم
حزين إوتغبش انهارك فرح
چفك حنين الكل محب منك عليك إنجرح
صدرك يهيم إويحضن
إجروح الشهيد..
النازف
إبطوله.. سبح
ضميرك مهرة العباس
لو فارس
وگع..
منها إنذبح
نهار أظلم على اسيوفك بچيت
يوج جمره الحنين إمن الحزن
لا..
ولا.. مره
إنحنَت روحي
ولا ذليّت
أذكر من يجي إمغتر يطر ليل الگصب والهور
صهيل إوگمره بعيونك.. تعدل الخاطر المكسور
بين الفاله و الفاله.. شهيد.. إمعلگ إومنحور
عراق إنتَ واجيت إمنين
إخذ إچفوفي إلك جرفين
هذا آنه نهر اظلم حزِين إوبارد الجرفين
إخذ الروح بچفوفك لهيب أزرگ خفگ جنحين
أتوسل بيديك
إوأعبد انهارك
إخذني اوياك إلك جنحين
تهيم الظلمه بترابك اغاني إمن الحزن ظلّيت
تنوح إمي.. عليك
إوتحزن انهارك
ليالي إبلا صبح
آخ.. چم غبشه حزِينه
إبلا وطن صلّيت
كل ثوره تبدي الصبح.. آخ.. إنت تبدي إمنين
ما تدري كوخ الگصب.. ظلمه إو حلم شمسين
سيفك طويل إويلمض إبليل السفر.. ليوين..؟
طولك فرح.. بالمشي
إحصانك حزِين إو يضوي بعيونك بچي
ردتك حنين.. إتوجني..
بچفوفك
گمر..
حتى الصبح.. غنّيت
صديق إنتَ
حنين إنتَ
حزِين..
إوتلتفت گمره..
صهيل الطول..
ياخذ كل إصابيعي
جنون إمن الفرح.. وجيّت
صدر الفرات إرتفع شايل هموم الناس
غطى الجثث بالدمع.. بين الورد والياس
يشرب تتن للصبح.. جمره الشمس بالكاس
حزِين النهر يتلگه الجثث بالليل
حزِين إوخايف الجرفين ظلمه إوويل
حزِين..
الموت بعيونك و لا وصيّت
أعرف ضميرك
گمر..
يشيلك مد. حنين
الياخذ إچفوفي
شراع اول سفينه
إمن الفرح.. وجيّت
شيب إمي ليكم غُبَش حزن إوفرات ازرگ
إچفوفج ليالي إوجمر.. گمره النهر.. يعرگ
خيل إتوج على الجرفين لو شافت گمر.. يغرگ
ردتك صديق إووطن بالروح
ردتك سفينه إوگمر ما أدري وين إنروح
تهيم إجروحي..
بالظلمه..
بيارغ من لهب.. وجيّت
أصيح إبصوت تسمعني و لا ردّيت
شيبك يهزه الريح..
مذعور..
إوعلى اچتافك..
نهار إمن الجنون.. يهيم..
ويطيح
خلّي السبحه و الفنجان..
ما تلگه البخت بين الخرز تسبيح
مهرك صهيل إودمع..
سيفك حزِين إويشع
وإنتَ إبعيد..
لا غيم ضميرك
لا..
و لادمعة حزن هلّيت
وحدك حزِين إعله الثلج كل العمر ظلّيت
يا حيرة الناس..
يا نعش الشهيد اوريحة الياس
يا نهر الحزن – مامش بخت – للناس
على الجرفين
بچفوف اليتامه إشموع إلك ودّيت
هذا الياس مغسول ابدمع إمي إلك ودّيت
يانهر مايك حزين
يانهر ذاك الورد خايف حزين
يانهر صار الوطن دمعة طفل مسكين
يانهر شيب إمي ريح إويلمض إبليل الحزن.. ليوين..؟
تصيح إبصوت تسمعها ولا ردّيت
تظل إتصيح
إلك..
خايب إلك
كل الزلف گصّيت
أطيحن صوت عالجرفين إلك ذليّت
گمر ناصي عليك إمن الحزن وجيّت
الشاعر عزيز السماوي
