غصن حنه

الشاعر كريم الجسار
شبهتك احببت شبيهك ادركت لماذا اجدادي
عبدوا الاصنام
لميعه عباس عماره
( غصن حنه ) كريم الجسار
بكت منج وبعض البوك مشروع
والمثلج على الزينات يكدر
مو كل التعذر عذره مسموع
ولا كل اليبوك يبوك مضطر
لكن من يصير بعذر متبوع
حر اليعذر وحر التعذر
ادري الورد للشم كطعه ممنوع
بس هوه الورد عالكطع يسحر
لايبجي بجي الصفصاف ويلوع
ولا بالمزهريه الورد يكبر
لو خد الورد يتروه بدموع
جا عافه النده وبالليل سافر
وانا عندي كلب بالقافيه يموع
لايصبر ولا كوه ايتصبر
يعبر ليله وكفه بنفس مكطوع
خانك عبرته وكوه ايتحسر
ولولا حزمنه بحسرته ضلوع
جا طك طكة البيضه وتفسر
وانتي من القوافي البيض ينبوع
فيضه من الشعر وافياي عنبر
واحه من القصايد خضرة اربوع
ناعورج ذهب وجروف مرمر
مرسم للصور كل لمحه موضوع
كل سرحة خيال اتصير منظر
غصنج حنه شب من اول اسبوع
وظل طول العمر للشمس ينشر
باقي الطعم نفسه ولونه والنوع
ملح شطوط ملحه وما تغير
وغصن الحنه لو من هرشه مشلوع
هم يبقى بعبيره ولونه الاخضر
الشعر ياام الشعر دمعات مفجوع
تندل شاعر البعيونه تسهر
وسوك اهل الشعر بايع ومبيوع
بس ينراد شرايه اتخير
صح عمر النجوم غياب وطلوع
بس ياهي اليحطهه الليل معبر
مو كل المشه ويه الجرف دافوع
ولا كل اليكول الشعر يشعر
الشعر ينعد شعر من يظل مطبوع
طبع بالذاكره وعالبال عمر
وانا جسار مهري ايكطع صروع
لكن ما دنت نفسه وتجسر
ينكز للسما نكزة الملسوع
بس وكت اليشوف العيب يعثر
صح غربه وليالي ايذوبن شموع
واجر بالحارنه وكود الله تنجر
والسجه اصبحت بيبان وفروع
يطولن وانا ادك والعمر يكصر
لكن من عبرته براس مرفوع
ولا متندم العمر التطشر
بعده الصبر ثيله بروحي مزروع
كلما حشته الصدمات يكثر
القيت هذه القصيده في حفل تكريم الشاعره
لميعه عباس عماره 2008