@ ترانيم محبة @
عمري ماغشيت واحد بالحياة
ونفس ال بگلبي يگوله لساني.
ولاصبغت النيه بألوان الخداع
ونيتي بيضه بكل وكت تلگاني
ولاضعت عن اليبادلني الحنان
ولاخفيت اعله اليود عنواني
وماعرفت اكره ولا اهوى الصراع
ودووم اقدم للاوده احساني
هذا طبعي وماتغيرني الظروف
الطيب سوله وعايش بوجداني
ماصرت مبهم ولا احب الظلام
واضح وكل البشر تقراني
اني ماعزيت. عاليهوى. اللقاء
ودوم اداعي بشوفة اليهواني
ادعي. عشره المايفارگها. الوئام
ولا أحط نچلة بگلب خلاني
وما أگلكم. دوم محمود الصفات
هم بشر تخطي وتصيب اوزاني
والزلل عمدا واذا سهوا؟. يصير
وبعض مرات الفخر يولاني
لكن اسويعات ويروح الغرور
والندم ياكل جميع اغصاني
واسرج خيول الرضا وما أستراح
وللسماح اركض ركض ما تاني
بس يغثني المايقدر. محتواي
ويلطخ بلون السواد الواني
ويحط بية الموش مالاتي بعباي
وباليعيلن. بالبخت. يبلاني
الشاعر كاظم الخفاجي
