&تجليبة من الارشيف&
اجلبنك يليلي الشيب غطه الراس
والعيشه ابسگم والناس موش الناس
لاخل لا صديج انشوف عنده احساس
أخذني المستحه وصابتني الريبه
°°°°°°°°°°°°°°°°°°°°°°°°°°°°°°°
اجلبنك يليلي وقصتي قصه
على الخلف ابگلبي ١٠٠ الف غصه
من عالي رموني اوطحت بالنصه
وماينفع بعد لعظاي كل طيبه
°°°°°°°°°°°°°°°°°°°°°°°°°°°°°°
اجلبنك يليلي اشكثر مامر ليل
لاناظر بگالي ولابعد ظل حيل
مومره زماني امرار بيه ايعيل
وخابت ضنتي خيبه باثر خيبه
°°°°°°°°°°°°°°°°°°°°°°°°°°°°°°
اجلبنك يليلي وخايف من الجاي
والطبرات مره ابهاي مره ابهاي
بكل صفحة الجروح وتاه مني الراي
هذآ الحال خاف اتگول مدريبه
°°°°°°°°°°°°°°°°°°°°°°°°°°°°°°°
اجلبنك يليلي و عيب اطخلك رأس
ولو بهروش گلبي الزمن بيهن داس
أني أدري الوكت فرگاس ماينجاس
ابعزم الله لخيب كل تجاريبه
°°°°°°°°°°°°°°°°°°°°°°°°°°°°°°°
اجلبنك يليلي اشبيك من تجليب
اوراح اصبغ وزين مابگه من الشيب
بالمكابر وصبري والحياة اتطيب
وعرفت الراح مني محد يجيبه
°°°°°°°°°°°°°°°°°°°°°°°°°°°°°°°
وعرفت الراح مني محد يجيبه
✒ كاظم الخفاجي
تجليبة من الارشيف
مقالات ذات صلة
