شنهي الغيرك خلاك تتحول

شنهي الغيرك خلاك تتحول

شعر : عباس طريم

القصيدة : منشورة في ديواني الثاني المطبوع قبل 4 سنوات

____

شنهي اللي جره وخلاك تتحول .. وشنهي الغيرك خلاك ما تسأل

اشوفك گصرت ياصاحبي وياي … والود انگلب , مرساكم اتبدل

وما توصل عتبتي وغيرت مسراك…وكلشي البيك من ود وتواصل , قل

چلمه انحچت ما مگصوده,بالديوان …وسمعتهه الشواذي ونشرت المقتل

واجوهه ارجال مهنتهم القيل وقال ..حطوا بيهه ” ان “, خلوهه ما تنحل

ما خليت مطرح للصلح وياي … واليحاول يردك للدرب , يفشل

لتقدر صديج ولا يهمك ناس … مصخم والصخام البيك متأصل

اعوج , والمثل بين العرب مگيول … الاعوج مهما طال الوكت ما يعدل

خف امطالسك وياي من الگاك … وما ترتاح من تگعد , وتتململ

عفتني وحولت , وجهك لعد شمات … ما ادريك وين اتريد تتوصل

ما خليت رجعه ولا نظرت ابعيد … من ظليت بينه اتشيل واتحمل

ما ندريك چنت اتراقب الزلات … وبعينك اتشوف وبيدك اتسجل

ماظل مستحه ابوجهك ولا ناموس … والماي البگصتك خلص واتوشل

عله هفوه وگلبت الطابك اعله النار .. واعلنت الحرب جهراً امام الكل

المواقف للاسف ما غزرت وياك … ولا خلت قرار الحرب يتأجل

ولا عشرة عمر عشناهه متنعمين … واسنين انگضت ذكراهه ما تنمل

بعت كل لحظه حلوه ويانه , ما ندريك ..صلف عينك وكيحه وردي وما تخجل

وصل حچيك الماصخ واللي ما اينلاچ … والما ينبلع , والمر مثل حنظل

لا زاد وملح غزر يناهي وياك … وطعنك بالظهر لا خف ولا بطل

وحچي البيني وبينك ماتعرفه الناس … صار اليوم بين الخلك يتنقل

شلت رايات حربك هيجي دون اسباب …وغيرت القواعد والحچي اتبدل

وشوشت باذن كل سرسري وهلفوت… وحركت الرماد الراكد ابمنقل

وعزفت الهم بالحانك على الايقاع … وكل مشعول سلفه اتسرفن اوطبل

بعتني وصدگت حجاية الوجهين … ومواقف الي وياك اهواي علو التل

وغيرت المسير ابعكس مجره الماي … وهاي افعال عالدوني وحقير , اتدل

مدري اشغيرك ياصاحبي اوخلاك … تجافيني وجنت وسط الگلب تحتل

ترافكني چنت كل يوم مثل الظل … واخترتك صديج ابين ربعي الكل

ابديك اعله روحي وگلت ما وفيت … اوظنيتك وفي , وهيهات تتبدل

وجنت لمن تجيني اشعر ابراحة بال … واشوفنك ابعيني اهلال يوم ايهل

چنت اتأمل انته اذراعي بالشدات … وتوكف بالمواقف چنت , اتأمل

وذا دار الوكت بيه وجفت دنياي …وما ظل صاحب اليوگفلي, انته اتظل

ومن اذكر وفه الصحبان والخلان … عليم الله .! اسمك ينذكر , اول

جنت اعمه الگلب ما اشوف غيرك ناس.. مثل واحد ابديره وتاه ما يندل

عرفتك يانذل متخفي ابوجهين …. وجه حاضر اوياي اوجه خلف الظل

زله انته ابحياتي ونقطه سوده اودوم … اصبرالروح ,اكول الناس كلهه اتزل

ما اسامح الروح الچانت اتهم بيك … وما ترضاش اله اوياك , تتعلل

ظنيت العواصف ما تاثر بيك …. واتخليك , ليله اويوم تتحول

اوظنيتك امين وناصح ابمكفاي … وبماي القذر والعفن ما تبتل

وعبالي انته اخوي اليهد بالشدات … وكل صعبه التجيني ايدور الهه الحل

غربتلك شفت وزنك خفيف اهواي … من هزه ,اوطحت من فتحت المنخل

المواقف تكشف الچذاب واتعريه … واذا متصدگ احچاياتي روح اسأل

وبدل ما تعمر الخوة العشتهه اوياي … فلشت المواقف كلهه , بالمعول

ما خليت ” مطرح ” للملح والزاد … ساعتهه گلت صاحبنه ميطول

وما چذب الراوي البيت صار ابعيد …. ودكان الجگاير والتتن عزل

فرحت العدو ياحيف بيه وبيك … من شاف التناحر , صفك وهلهل

من شاف الكره يشتعل مثل النار …. ومن شاف الحقد بگلوبنه اتسلل

وخليت الكلوب , التركض الملگاك .. . تغير حالهه وحست ابشوفك ذل

عرفتك ذيب محد يامن الممشاك … تگص بظهور خلانك مثل منجل

غيرت الموده العشنه بيهه اسنين .. واشعلت الضغاين , والتنافر حل

لعنت اليوم المصخم الشفتك بيه … يالدوف الحقاره ابحچي المعسل

لا تحسبني خل وصاحب امن اليوم .. لانك ياردي , لا صاحب ولاخل

ومثل ما گال امام العدل داحي الباب … ” خير القول ما قل وبعد مادل”

اتيسر روح للناس المثل شرواك … اذا رديت , راح اضطر اگلك : ول ..؟